ئانام بىلمىسۇن

ئانام بىلمىسۇن
******
سۆز ئاچمىغىن ئاھۇ-زارىمدىن،
يۈرەگىنى ئەلەم تىلمىسۇن.
سۆزلە پەقەت بەختۇ-بارىمدىن،
دەرتلىرىمنى ئانام بىلمىسۇن.
***
كۆرەلمەسلەر كۈلسە ھەم مەيلى،
دۇنيانى تار قىلسا ھەم مەيلى،
دۈشمەنلىرىم بىلسە ھەم مەيلى،
دەرتلىرىمنى ئانام بىلمىسۇن.
***
ھايات ئۆتەڭ كەلگەنلەر كېتەر،
ئۇندىن كىملەر قايغۇسىز ئۆتەر؟
پەرزەنتىم دەپ قېرىدى يېتەر،
دەرتلىرىمنى ئانام بىلمىسۇن.
***
ئىرادەم بار كەلسە مىڭ كۈلپەت،
ئانام كۈلۈپ يۈرسۇن تائەبەد،
شادلىقىمنى ئاڭلىسۇن پەقەت،
دەرتلىرىمنى ئانام بىلمىسۇن.
***
بار چېغىدا قەدرىنى قىلاي،
دۇئا ئېلىپ، رازىلىق سوراي،
ئۆزۈم ئۇنىڭ دەردىنى ئالاي،
دەرتلىرىمنى ئانام بىلمىسۇن.
2015-3-28