بۇھايات مانا مۇشۇنداقكەن

مەنچە بولسا ھايات دىگەن ئەنە شۇ


مۇھەممەتجان راشىدىن



چۈشەندۈر دەپ تۇرىۋالدىڭ ھاياتنى،

نىمە دەيمەن يەنە دىسەم يەنە شۇ.

كەلمىدۇقمۇ ئەتە ئۈچۈن ئاھ چېپىپ،

مەنچە بولسا ھايات دېگەن ئەنە شۇ.



بېسىلمايدۇ ھاياتلىقنىڭ ۋاڭ–چوڭى،

تاپالمايسەن نەدە ئۇنىڭ تەڭپۇڭى،

بىرى خۇشال، بىرىنىڭ بار ھال-مۇڭى،

مەنچە بولسا ھايات دېگەن ئەنە شۇ.



گاھ ئېتىزدا ئارپا بۇغداي تېرىيسەن،

گاھ خاماندا غۇلاچىڭنى كېرىيسەن،

تىرىكچىلىك ھارۋىسىدا قېرىيسەن،

مەنچە بولسا ھايات دېگەن ئەنە شۇ.



ئاھ ئۇرارسەن ئارزۇيۇڭغا يېتەلمەي،

يا ئارزۇنىڭ ئىشىكىدىن كېتەلمەي،

گاڭگىرايسەن بىرنى ئىككى ئېتەلمەي،

مەنچە بولسا ھايات دېگەن ئەنە شۇ.



دۇرۇس تەبىر: ئۆمۈر-ئاتقان ئوق دېگەن،

بۇ ئالەمگە قانغان كىشى يوق دېگەن،

بىرلىرى ئاچ، بىراۋلىرى توق دېگەن،

مەنچە بولسا ھايات دېگەن ئەنە شۇ!



شائىر يازار: ئۇلۇغ ئىنسان ئانا ! دەپ،

ئانا ئۆتەر بۇ دۇنيادىن بالا ! دەپ،

بالا كۆزى تەلمۈرىدۇ دالا دەپ،

مەنچە بولسا ھايات دېگەن ئەنە شۇ !